بارشوں کے دوران کی جانے والی احتیاطی تدابیر

Precaution in rain

کراچی : طوفان اور تیز بارشوں میں نقصان کا اندیشہ زیادہ ہوتا ہے، اسی لئے حکومتِ سندھ کی جانب سے چند ایسی احتیاطی تدابیربتائی گئی ہیں جن پر عمل کرنے سے نقصان سے بچا جاسکتا ہے۔

نیلوفر طوفان سے نقصان کے اندیشے کی بناء پر پروفینشل ڈیزاسٹر مینجمنٹ اتھارٹی کی جانب سے احتیاطی تدابیر کے اشتہارات دیئے گئے ہیں، جن پر عمل کرکے نقصان سے بچا جاسکتا ہے، عارضی اور کچے گھروں میں رہائش پذیر افراد فوری طور پر حکومتِ سندھ کے ریلیف کیمپس میں منتقل ہوجائیں، دورانِ بارش غیر ضروری طور پر نکلنے سے پرہیز کریں۔

طوفان اور بارش میں سڑکوں کی حالت خراب ہوتی ہے اسی لئے گاڑی چلاتے ہوئے احتیاط کریں اور سلو ڈرائیونگ کریں، گری ہوئی بجلی کی تاروں سے دور رہیں اورانہیں ہرگز نہ چھوئیں یہ جان لیوا ہوسکتی ہیں، ساحل سمندر کے نشیبی علاقوں میں رہنے والے اپنے سازوسامان کو بالائی حصے پر محفوظ کریں۔

ریڈیواور ٹی وی پر حکومت کی جانب سے جاری کردہ اعلانات کو سنتے رہیں، اپنے پاس ٹارچ، دیا سلائی، کاغذ اور ریڈیو سمیت دیگر ضروری سامان ساتھ رکھیں، تمام ضروری ادویات پلاسٹک کے بیگ میں اپنے ساتھ رکھیں۔

دیہی علاقوں میں ایسے موقعوں پر سانپ کے ڈسنے کے زیادہ امکانات ہوتے ہیں، لہذا احتیاط برتیں، ساحل پر دفعہ ایک سوچوالیس نافذ ہے لہذا ہر گزساحل کا رخ نہ کریں۔ بچوں کو پاور ساکٹس اور برقی آلات کے قریب نہ جانے دیا جائے۔ گیلے الیکٹرک سوئچز کو ہاتھ مت لگائیں۔ جنریٹر اور پانی کی موٹر کو گیلا ہونے سے بچائیں۔

بجلی کی تاروں اور کھمبوں کے قریب پانی کے جوہڑ سے دور رہیں ہوسکتا ہے کہ ان میں کرنٹ ہو، اپنی گاڑیوں ، موٹر سائیکل کو کھمبوں کے نیچے پارک مت کریں۔ درختوں ، سائن بورڈز اور کھمبوں کے نیچے نہ کھڑے ہوں۔

 

Scroll To Top